Pola Esperanto-Junularo – Polska Młodzież Esperancka

La 67-a Internacia Junulara Kongreso okazos tre proksime de Pollando - en Ukrainio. Decido pri tio estis alprenita dum la lasta estrarkunsido de TEJO.

Temo proponita por la kongreso estas “Stabila evoluo - nova koncepto por homaro”. La aranĝo okazos julie 2011 proksime de Kijivo. La organizan teamon kreos UkrEA (Ukrainia Esperanto-Asocio) kaj ULEJ (Ukrainia Ligo de Esperantista Junularo). Tio estos la unua IJK en Ukrainio. La kongresejo troviĝas proksime de la Kijiva akva rezervejo.

Cetere, la ĉi-jara 66-a Internacia Junulara Kongreso okazos en Kubo. Pliajn informojn pri ĝi serĉu ĉe la paĝaro tejo.org/ijk/2010.

Pli ol 200 gejunuloj el tuta Eŭropo festis novjaron en Zakopane dum la aranĝo organizita de Pola kaj Germana Esperanto-Junularoj kaj klubo Varsvia Vento. Ene de tiu semajno okazis pluraj koncertoj, teatraĵoj kaj ekskursoj, sed ankaŭ diskutoj, prelegoj kaj debatoj.

La unua JES okazis inter la 26-a de decembro 2009 kaj 3-a de januaro 2010. Ĝi estas kuniĝo de du antaŭaj novjaraj junularaj esperanto-aranĝoj – la Ago-Semajno (AS) de Pola E-Junularo kaj la Internacia Seminario (IS) de Germana E-Junularo, kiuj okazadis aparte ĝis la jaro 2008.

Pli detale pri la evento legu en artikolo pri la 1-a Junulara E-Semajno.

Emblemo de JES

Proksimiĝas la Junulara E-Semajno (JES) – novjara aranĝo organizata de Pola kaj Germana Esperanto-Junularoj kaj Varsovia Vento. La 1-a renkontiĝo el la serio okazos inter la 26-a de decembro 2009 kaj la 3-a de januaro 2010 en Zakopane, Pollando. Aliĝis jam pli ol 200 homoj el 25 landoj. Temo de ĉi-jara JES estas „Prezentu vin - ekkonu nin. Proksimeco de la eŭropaj kulturoj”.

Honoran patronecon de la renkontiĝo akceptis Profesoro Władysław Bartoszewski, Ministro pri la Internacia Dialogo en Kancelario de la Pola Ĉefministro, S-ro Michael H. Gerdts, Ambasadoro de Germanio en Pollando, S-ro Janusz Majcher, la urbestro de Zakopane kaj S-ro Steffen Mues, la urbestro de Siegen (ĝemelurbo Zakopane).

JES estas kuniĝo de du antaŭaj novjaraj junularaj esperanto-aranĝoj – la Ago-Semajno (AS) de Pola E-Junularo kaj la Internacia Seminario (IS) de Germana E-Junularo, kiuj okazadis aparte ĝis la jaro 2008. Junulara E-Semajno okazados ĉiujare dum unu semajno en alia loko de Meza Eŭropo.

Pliajn informojn serĉu ĉe la oficiala paĝaro de JES.

Projekto de PEJ-paĝaro prezentita dum kunveno en Vroclavo

Finfine, post longdaŭraj laboroj la 1-an de septembro 2009 en la reto aperis tute nova paĝaro de Pola Esperanto-Junularo. Projektado en sistemo WordPress komenciĝis jam aprile, tamen pro organizado de Internacia Junulara Kongreso en Liberec’, ni ne povis dediĉi al ĝi tiom multe da tempo, kiel ni volus. Nun, kiam ni ĉiuj jam revenis de someraj vojaĝoj eblis pluevoluigi la projekton ĝis stato montrebla al la ekstera publiko. Kompreneble tiu ĉi paĝaro ankoraŭ ne estas fine preta kaj foje mankas iuj aferoj, sed ni klopodos kompletigi ilin dum venonta tempo. Krome, kiel ĉiu nova projekto, ĝi certe ne povas esti senerara, do ni petas informi nin pri rimarkitaj eraroj (eĉ se temas pri iu literumaĵo). La kontaktadreso por sendi erarojn, sed ankaŭ liberajn komentojn kaj pripensoj pri la nova paĝaro estas reto ĈE pej.pl. Ni deziras al vi agrablan restadon en nia modesta retejo kaj antaŭdankas pri helpo en ĝia plibonigado.

Bonege organizita Kultur-lingva festivalo, debuto de la rokgrupo Supernova, Kim ludanta akordionon sur tegmento de kongresejo, JoMo koncertanta en la urba ĉefplaco, lanĉo de nova Pasporta Servo, nokta vivo ĝis mateno kaj neforgesebla etoso - tiel 343 homoj el 41 landoj memoros la 65-an Internacian Junularan Kongreson. Krome en la aranĝo tre abundis taga programo, okazis interesaj ekskursoj, estis elektita nova estraro de TEJO kaj estis proklamita kongresa rezolucio. IJK-n okazintan en Liberec’, urbo situita apud Ĉeĥa-Germana-Pola trilandlimo organizis Esperanto-Junularoj de ĝuste ĉi tiuj tri landoj.

Por ekscii pli multe legu la Raporton de la 65-a Internacia Junulara Kongreso.

Estraro de TEJO

Dum la 65-a Internacia Junulara Kongreso en Liberec’ la Komitato de Tutmonda Esperantista Junulara Organizo elektis novan Estraron. Reelektitaj estis Gregor Hinker el Aŭstrio kiel Prezidanto kaj Sergeo Tyrin el Israelo kiel Kasisto. Aldone estis elektita Oleksandra (Saŝa) Kovyazina el Ukrainio, Irmina Szustak el Pollando kaj Łukasz (LukiZ) Żebrowski el Pollando kiel Vicprezidantoj kaj Paulína Kožuchová el Slovakio kiel Ĝenerala Sekretario.

Gregor en la nova Estraro daŭre respondecos pri Eksteraj Rilatoj, Saŝa pri Informado, Irmina pri Landa Agado, Łukasz pri Kongresoj, Seminarioj kaj Aktivula Trejnado. Rimarkindas, ke 3 el 6 membroj de la nova TEJO-Estraro estas membroj de Pola Esperanto-Junularo.

Varsovia Vento Elsendoj

Reta radio de la Eperanto-klubo Varsovia Vento havas novan paĝaron. Funkcianta de la 2006-a jaro, la radio translokiĝis al adreso podkasto.net. En la paĝaro bazigita sur sistemo WordPress troviĝas kompreneble la plej aktualaj elsendoj sed ankaŭ interalie arkivejo kun plej interesaj pecoj de malnovaj elsendoj, anoncejo kaj informoj pri la redakcio.

PS 2.0

Pasporta Servo, unu el la plej furoraj servoj de TEJO estas nuntempe modernigata. Kiel la plej garava elemento de Pasporta Servo 2.0 rolos nova paĝaro: www.pasportaservo.org. Jam ekde marto eblas aliĝi. Oficial malfermo estas planata por la 7-a de majo. Pliaj informoj troveblas en la intervjuo publikigita en paĝaro de TEJO.

Pasporta Servo estas socia servo grupiĝanta homojn, kiu povas senpage akcepti gastojn en siaj hejmoj, aŭ tiujn, kiuj deziras uzi la eblecon. Tamen por uzi la servon necesas paroli Esperante.

TEJO

Finfine alvenis decido de la Estraro de Tutmonda Esperantista Junulara Organizo pri la venontjara Internacia Junulara Kongreso. Por la loko de la 66-a IJK estis elektita Santa Cruz del Norte en Kubo.

La kongreso okazos de la 24-a ĝis la 31-a de julio 2010, do tuj post la Universala Kongreso.